पुरस्कार मिळण्यासाठी मेहनत घ्यावी लागते : आमदार म्हात्रे

महाराष्ट्र राज्य क्रीडा दिन साजरा

कल्याण

शिवछत्रपती पुरस्कार मिळण्यासाठी मेहनत घ्यावी लागते. ग्रामीण भागातील मुलांनी मैदानाची मागणी केली तर ती उपलब्ध करुन दयावीत, शिवछत्रपती पुरस्कार मिळालेल्या मुलांना शासकीय सेवेत नोकरी मिळावी ही मागणी अधिवेशनात केल्याची माहिती कोकण विभागाचे शिक्षक आमदार ज्ञानेश्वर म्हात्रे यांनी देत कुस्तीपटू खाशाबा जाधव यांचा आदर्श सर्वांनी घ्यावा असे प्रतिपादन केले.

कल्याण डोंबिवली महानगरपालिका व ठाणे जिल्हा आटयापाटया असोसिएशन यांच्या संयुक्त विदयमाने खाशाबा जाधव यांचा जन्मदिन महाराष्ट्र राज्य क्रीडा दिन म्हणून आचार्य अत्रे रंगमंदिरात संपन्न झाला. महाराष्ट्र राज्य क्रीडा दिनाच्या जनजागृतीसाठी यशवंतराव चव्हाण क्रिडांगणापासून आचार्य अत्रे रंगमंदिरापर्यत ‘क्रिडा जागर रॅली’चे आयोजन करण्यात आले होते. यामध्ये सुमारे ४०० शालेय विदयार्थ्यांनी उत्स्फुर्तपणे सहभाग घेतला.

प्रखर राजकीय इच्छा शक्ती असेल तर जगात ऑलिंपिकमध्ये सर्वात जास्त पदके भारताला मिळू शकतील असा आशावाद ठाणे जिल्हा आटयापाटया असोसिएशनचे अध्यक्ष जगन्नाथ शिंदे यांनी आपल्या भाषणात व्यक्त केला. यश मिळालं तर ते डोक्यात जाता कामा नये, आपण समाजाचं देणं लागतो, हे नेहमी लक्षात ठेवल पाहिजे, चांगले संस्कार लाभले तर चांगला माणूस बनू शकतो, असे उद्गार रणजीतसिंह खाशाबा जाधव यांनी आपल्या भाषणात काढले.

यासमयी माजी आमदार नरेंद्र पवार, रणजीतसिंह जाधव यांच्या पत्नी भारती, कल्याण तालुका शारीरिक शिक्षक मंडळाचे अध्यक्ष लक्ष्मण इंगळे, पूर्वा मॅथ्यु लोकरे, प्राचार्य सुप्रिया नाईकर, शिव छत्रपती पुरस्कार विजेते प्रशांत पाटील, अविनाश ओंबासे, राष्ट्रीय शिक्षण संस्था डोंबिवलीचे अध्यक्ष संजय कुलकर्णी, शिक्षण व क्रीडा विभागाचे उपआयुक्त धैर्यशील जाधव, उपआयुक्त अर्चना दिवे तसेच महाराष्ट्राची हास्यजत्रा फेम शिवाली परब, निमिष कुलकर्णी व इतर मान्यवर उपस्थित होते.

उपस्थित मान्यवरांनी केडीएमसी क्षेत्रातील क्रीडा-प्रगती, आव्हान, संधी या विषयावर आयोजिलेल्या परिसंवादात आपली मौलिक मते मांडली. खाशाबा जाधव यांचे सुपूत्र रणजीतसिंह व त्यांच्या पत्नी भारती तसेच पॅरा कबड्डी राष्ट्रीय खेळाडू व  केडीएमसीच्या उंबर्डे शाळेतील माजी विदयार्थी अजय सोमनाथ पाटील यांचा जगन्नाथ शिंदे यांचे हस्ते सत्कार करण्यात आला. महाराष्ट्राची हास्यजत्रा फेम शिवाली परब, निमिष कुलकर्णी यांनी आपल्या खुमासदार अदाकारीने कार्यक्रमाची रंगत वाढविली तर नियोजन व सूत्रसंचालन शिवछत्रपती पुरस्कार विजेते अंकुर आहेर यांनी केले.

कल्याण डोंबिवली महानगरपालिकेचे योग्य ते क्रीडा धोरण सर्वांचे सहकार्याने ठरविण्यात येईल. महापालिका क्षेत्रातील क्रीडांगणे विकसित करून योग्य त्या क्रीडा सुविधा उपलब्ध करून देण्यात येईल, त्याचप्रमाणे महापालिका क्षेत्रातील उत्कृष्ट कामगिरी करणाऱ्या विद्यार्थ्यांना महानगरपालिकेकडून अनुदान उपलब्ध करून दिले जाईल असे प्रतिपादन शिक्षण व क्रीडा विभागाचे उपायुक्त धैर्यशील जाधव यांनी यावेळी केले.