कागदी होड्यांतून जनजागृतीची विश्वविक्रमी भरारी -

दिनेश गुप्ता यांचा गिनीज वर्ल्ड रेकॉर्डचा प्रयत्न

कल्याण

प्रसिद्ध मोटिव्हेशनल स्पीकर, लेखक आणि विश्वविक्रम धारक दिनेश गुप्ता (आनंदश्री) यांनी मुलांमध्ये मोबाईलच्या अतिवापराबाबत जनजागृती करण्यासाठी अनोखा उपक्रम राबवला. या उपक्रमांतर्गत त्यांनी अवघ्या एका तासात २७५ ओरिगामी (कागदी) होड्या तयार करून नवीन गिनीज वर्ल्ड रेकॉर्ड प्रस्थापित करण्याचा प्रयत्न केला.

“पाऊस येत आहे आणि आमची होडी तयार आहे” या संदेशातून मुलांनी मोबाईलमध्ये वेळ घालवण्याऐवजी सर्जनशील उपक्रम, हस्तकला आणि कल्पनाशक्तीला वाव द्यावा, हा या उपक्रमाचा मुख्य उद्देश होता.

यापूर्वी एका तासात सर्वाधिक २५० कागदी होड्या तयार करण्याचा विक्रम नोंदवला गेला होता. दिनेश गुप्ता यांनी २७५ होड्या तयार करून हा विक्रम मोडल्याचा दावा केला आहे.

या विक्रम प्रयत्नादरम्यान गिनीज वर्ल्ड रेकॉर्डच्या सर्व आवश्यक नियमांचे पालन करण्यात आले. संपूर्ण प्रक्रियेचे व्हिडिओ चित्रीकरण, स्वतंत्र साक्षीदारांची उपस्थिती आणि आवश्यक कागदपत्रांची पूर्तता करण्यात आली आहे. या विक्रमाची अधिकृत पुष्टी Guinness World Records कडून पडताळणी प्रक्रिया पूर्ण झाल्यानंतर जाहीर होणार आहे.

सामाजिक संदेश, सर्जनशीलता आणि मुलांमध्ये मोबाईलच्या अतिवापराबाबत जागरूकता निर्माण करण्याच्या उद्देशाने राबविण्यात आलेल्या या अनोख्या उपक्रमाचे सर्व स्तरांतून कौतुक होत आहे.