२४ जुलैला सुद्धा पावसाची उसंत नाही ! -

ठाणे पालघर रायगडमध्ये अतिमुसळधार पावसाचा इशारा

ठाणे

मुंबईसह कोकणाला झोडपणाऱ्या पावसाचा जोर शुक्रवार, २४ जुलै रोजीही कायम राहण्याची शक्यता आहे. भारतीय हवामान विभागाच्या मुंबई प्रादेशिक हवामान केंद्राने जारी केलेल्या ताज्या अंदाजानुसार उत्तर कोकणात बहुतांश ठिकाणी पाऊस पडण्याची शक्यता असून ठाणे, पालघर आणि रायगड जिल्ह्यांत काही ठिकाणी मुसळधार ते अतिमुसळधार पावसाचा इशारा देण्यात आला आहे.

ठाणे-पालघरमध्ये जोर कायम

ठाणे आणि पालघर जिल्ह्यांत काही ठिकाणी मुसळधार ते अतिमुसळधार पाऊस पडण्याची शक्यता आहे. पावसासोबत जोरदार वारेही वाहण्याचा अंदाज आहे. ठाणे जिल्ह्यातील कल्याण-डोंबिवली परिसरालाही हा हवामान अंदाज लागू असल्याने नागरिकांनी सतर्क राहणे आवश्यक आहे.

रायगडलाही अतिमुसळधार पावसाचा धोका

रायगड जिल्ह्यातही काही ठिकाणी मुसळधार ते अतिमुसळधार पावसाची शक्यता वर्तवण्यात आली आहे. मुसळधार पावसामुळे सखल भागात पाणी साचणे, रस्ते व वाहतुकीवर परिणाम होणे तसेच कमकुवत झाडे उन्मळून पडण्याचा धोका असल्याचे IMD च्या Impact Based Forecast मध्ये नमूद करण्यात आले आहे.

मुंबईतही पाऊस सुरूच

मुंबई शहर आणि उपनगरांसाठी २४ जुलै रोजी आकाश सामान्यतः ढगाळ राहून मध्यम ते जोरदार पाऊस पडण्याचा अंदाज आहे. तुरळक ठिकाणी ताशी ६० ते ७० किलोमीटर वेगाने वाऱ्याचे झोत येण्याची शक्यता आहे.

नागरिकांनी काय लक्षात ठेवावे?

मुसळधार पावसाच्या काळात सखल व पाणी साचणाऱ्या भागातून प्रवास करताना खबरदारी घ्यावी. जोरदार वाऱ्याच्या काळात कमकुवत झाडे अथवा असुरक्षित बांधकामांजवळ थांबणे टाळावे. स्थानिक प्रशासन आणि हवामान विभागाकडून दिल्या जाणाऱ्या ताज्या सूचनांकडे लक्ष ठेवावे.