कल्याणात हाय-टेक फ्लायओव्हर! -

UHPFRC तंत्रज्ञानासह SATIS प्रोजेक्ट अंतिम टप्प्यात

कल्याण

स्मार्ट सिटीच्या दिशेने वाटचाल करत असलेल्या कल्याण-डोंबिवली शहरात पायाभूत सुविधांच्या उन्नतीसाठी सुरू असलेल्या “कल्याण पश्चिम स्टेशन परिसर सुधारणा” प्रकल्पाने आता निर्णायक टप्पा गाठला आहे. स्मार्ट कल्याण डोंबिवली डेव्हलपमेंट कॉर्पोरेशन लिमिटेड (SKDCL) अंतर्गत राबविण्यात येणाऱ्या या महत्त्वाकांक्षी योजनेत सुभाषचंद्र बोस चौक ते बैलबाजार चौक दरम्यान उभारण्यात येणाऱ्या उड्डाणपुलाचे काम अंतिम टप्प्यात आले आहे.

सुमारे ११२५ मीटर लांबीचा आणि १८ ते ९ मीटर रुंदीचा हा उड्डाणपूल शहरातील वाहतूक कोंडी सोडवण्यासाठी गेम-चेंजर ठरणार आहे. विशेष म्हणजे, या प्रकल्पात प्रथमच “Ultra-High Performance Fiber Reinforced Concrete (UHPFRC)” या जागतिक दर्जाच्या तंत्रज्ञानाचा वापर करण्यात आला आहे. या बांधकामासाठी मलेशियातील प्रगत तंत्रज्ञानाचा आधार घेतला गेला असून, IIT Bombay यांनी स्ट्रक्चरल डिझाइनची (Proof Checking) पडताळणी केली आहे.

या उड्डाणपुलाच्या Span AP14-ACP1 आणि ACPI-ACP2 भागात UHPFRC चा वापर करण्यात आला असून, काल मध्यरात्री कल्याण स्टेशन समोरील पंडित जवाहरलाल नेहरू चौक येथे गर्डर लॉन्चिंग यशस्वीरित्या पार पडले. या वेळी महापौर हर्षाली चौधरी, आयुक्त अभिनव गोयल, शहर अभियंता अनिता परदेशी, कार्यकारी अभियंता रोहिणी लोकरे तसेच प्रकल्प व्यवस्थापन सल्लागार आणि कंत्राटदार उपस्थित होते.

स्टेशन परिसरातील विद्यमान पादचारी पूल (FOB) काढणे शक्य नसल्यामुळे, प्रवाशांच्या सोयीचा विचार करून नवीन तंत्रज्ञानाचा वापर करून पर्यायी उपाय राबविण्यात आला. यामुळे प्रकल्पाच्या अंमलबजावणीत तांत्रिक कौशल्य आणि नियोजनाचा उत्तम समन्वय दिसून आला.

UHPFRC हे पारंपरिक काँक्रीटपेक्षा ५ ते ६ पट अधिक मजबूत आणि टिकाऊ मानले जाते. सिमेंट, सिलिका फ्युम, स्टील फायबर्स आणि विशेष रसायनांच्या मिश्रणातून तयार होणारे हे काँक्रीट अत्यंत दाट असल्याने हवामान, प्रदूषण किंवा तडे यांचा परिणाम अत्यल्प होतो. परिणामी, पुलाचे आयुष्य १०० वर्षांहून अधिक वाढते. तसेच, हलके पण भक्कम स्ट्रक्चर असल्याने भूकंपासारख्या आपत्तींमध्येही अधिक सुरक्षितता मिळते.

Kalyan-Dombivli Municipal Corporation कडून राबविण्यात येणारा हा प्रकल्प शहराच्या पायाभूत सुविधांमध्ये मोठी भर घालणारा ठरणार आहे. यापूर्वीही मुंबई-पुणे एक्सप्रेसवेवरील “मिसिंग लिंक” प्रकल्पात अशाच प्रकारच्या अत्याधुनिक तंत्रज्ञानाचा यशस्वी वापर करण्यात आला आहे.

एकंदरीत, हा उड्डाणपूल पूर्ण झाल्यानंतर कल्याण पश्चिम स्टेशन परिसरातील वाहतूक व्यवस्था अधिक सुलभ होणार असून, शहराच्या स्मार्ट सिटी व्हिजनला गती मिळणार आहे.